******
ഫെയ്സ്ബുക്കിലെ ഫോട്ടോഗ്രാഫര്‍മാരെ പോലെയാണ് ഫെസ്റ്റിവലിലെ ജനം. കണ്ടുമുട്ടുന്നതില്‍ പകുതിയും സംവിധായകരോ തിരക്കഥാകൃത്തുക്കളോ ആണ്.
"ഞാനൊരു 'സാധനം' ചെയ്തിട്ടുണ്ട്. അടുത്ത ആഴ്ച റിലീസ് ആണ്."
"ഓ.. തിരുവനന്തപുരത്ത് ഏത് തീയറ്ററിലാണ് റിലീസ്.?"
"തീയറ്ററില്‍ അല്ല. 'യൂട്യൂബി'ല്‍ ആണ്."
"ആഹാ, ജസ്റ്റിന്‍ ബീബറും ചന്ദ്ര ലേഖയും വന്ന വഴി, അല്ലെ. എല്ലാ ആശംസകളും."
******
" അല്ല ചേട്ടാ കഴിഞ്ഞ ഫെസ്റ്റിവലിന് നിങ്ങളുടെ കൂടെ ഉണ്ടായിരുന്ന ആ താടിക്കാരന്‍ എവിടെ?"
"ഓ, ശശിയോ..? അയാള് വെള്ളമടി നിര്‍ത്തി. ഇനി എന്തോന്ന് കമ്പനി..?"
******
"കുങ്കിടിക്കിന്റെ സിനിമ കണ്ടോ?"
"കുങ്കിടിയോ?"
"ങാ, ആ ചൈനാക്കാരന്‍ സംവിധായകന്‍ ഇല്ലേ 'കുംകിടി'...?"
"കുംകിടി അല്ല കിം കി ഡുക്, കൊറിയക്കാരന്‍.."
"ങാ ആരായാലും അതിലിത്തിരി 'കാണാന്‍' ഉണ്ട്."
(അത്രേ ഉള്ളൂ..)
******
സിനിമ തുടങ്ങുന്നതിന് മുന്‍പ് അടുത്ത സീറ്റിലിരുന്ന രണ്ട് പേര്‍ ഭയങ്കരമാന ചര്‍ച്ച. വിഷയം ലോക സിനിമ തന്നെ.
സിനിമ തുടങ്ങി അഞ്ച് മിനിറ്റ് കഴിഞ്ഞപ്പോള്‍ അതിലൊരാളുടെ ഫോണ്‍ ബെല്ലടിച്ചു.
അപ്പുറത്ത് സംസാരിക്കുന്നത് ചെറിയ ശബ്ദത്തില്‍ കേള്‍ക്കാം. .. ഭാര്യയാണ്..
"നിങ്ങള്‍ എപ്പഴാ വരുന്നത്.?"
"ഞാന്‍ താമസിക്കും..."
"വേണ്ട. അവിടെ തന്നെ താമസിച്ചോ.. ഇവിടെ നാളത്തേക്ക് അരിയില്ല, പഞ്ചസാരയില്ല.. "
(സമാധാനപൂര്‍വ്വം ഭര്‍ത്താവ്): "എന്തൊക്കെയാ വാങ്ങേണ്ടത്...?"
(ഡിം.. ഫോണ്‍ കട്ടായി... സമാധാന പൂര്‍ണമായ കുടുംബ ജീവിതത്തില്‍ ലോക സിനിമ ഒരു ഘടകമേയല്ല എന്ന തിരിച്ചറിവില്‍ പുള്ളിക്കാരന്‍ വേഗം സീറ്റ് കാലിയാക്കി.
*******
ആള് കൂടിയാല്‍ പാമ്പ് ചാകില്ല എന്ന പഴഞ്ചൊല്ല് ഫിലിം ഫെസ്റ്റിവലിന് ചേരും.
'സുഹൃത്തുക്കള്‍ കൂടിയാല്‍ സിനിമ കാണല്‍ നടക്കില്ല.' ഈ വര്‍ഷം ആകെ കണ്ടത് 12 സിനിമകള്‍. "സുവര്‍ണ ചകോരം നേടിയ 'പര്‍വിസ്' കാണാന്‍ കഴിഞ്ഞു എന്നതാണ് ആകെ ആശ്വാസം.
*******
വാല്‍: അര്‍നോള്‍ഡ് ഷ്വാസ്നെഗറെ പറയാന്‍ എളുപ്പത്തില്‍ 'ആര്യനാട് ശിവശങ്കരന്‍' ആക്കിയ മലയാളിക്കാണോ കിം. കി ഡൂക്കിനെ 'കുമ്പിടി' ആക്കാന്‍ പ്രയാസം.!
